Saturday, December 24, 2011

မြန်မာအမျိုးသမီးများ ပြည်ပနိုင်ငံသို့အလုပ်ဖြင့်စေလွတ်ချင်းခွင့်ပြုလိုက်ပြီ


တောင်ကိုရီးယား စက်ရုံတခုမှ မြန်မာအမျိုးသမီးအလုပ်သမားများ
မြန်မာအမျိုးသမီးများအနေဖြင့် ဆော်ဒီအာရေဗျနိုင်ငံမှအပ အလုပ်သမားဈေးကွက် လိုအပ်ချက်ရှိသော မည်သည့်နိုင်ငံတွင်မဆို တရားဝင် အလုပ်လုပ်ခွင့်ပြုလိုက်ပြီဟု အလုပ်သမားဝန်ကြီးဌာန ဒုတိယဝန်ကြီး ဦးမြင့်သိန်းက ပြောသည်။ ဝန်ကြီးက ပြည်ပတွင် အလုပ်လုပ်ကိုင်မှု ကြီးကြပ်ရေးကော်မတီ အနေဖြင့် ပြည်ပအလုပ်အကိုင် အခွင့်အလမ်းများတွင် အလုပ်လုပ်ကိုင်လိုသော အမျိုးသမီးများ၏ အခွင့်အရေး မဆုံးရှုံးစေရန်အတွက် အမျိုးသမီးများ ပြည်ပတွင် အလုပ်လုပ်ကိုင်နိုင်သည့် မူဝါဒတစ်ရပ်ကို ဒီဇင်ဘာလ ၉ ရက်နေ့က ချမှတ်ခဲ့ကြောင်း၊ ထိုမူဝါဒအရ အမျိုးသမီးများသည် အလုပ်သမား ၅ ဦးနှင့်အထက်ရှိသော ပြည်ပအလုပ်အကိုင် စက်ရုံ၊ အလုပ်ရုံ၊ အလုပ်ဌာနများတွင် သွားရောက် အလုပ်လုပ်ကိုင်နိုင်ပြီး အိမ်ဖော်၊ ဖျော်ဖြေရေးနှင့် သန့်ရှင်းရေး စသည့်အလုပ်များကို လုပ်ကိုင်ခွင့်မပြုကြောင်း၊ လတ်တလောအားဖြင့် ပြည်ပသို့ သွားရောက် အလုပ်လုပ်ကိုင်လိုသည့် အမျိုးသမီးများအား ထိုင်း၊ မလေးရှား၊ စင်ကာပူနှင့် ဂျပန်နိုင်ငံများသို့သာ စေလွှတ်ရန် ရည်ရွယ်ထားကြောင်း ပြောသည်။ ထိုသို့ စေလွှတ်လုပ်ကိုင်ရာ၌ သက်ဆိုင်ရာနိုင်ငံ အလုပ်သမား ဥပဒေအရ ရရှိခံစားနိုင်စေရေးနှင့် သက်ဆိုင်ရာနိုင်ငံ မြန်မာသံရုံးများ၊ အလုပ်သမားအရာရှိများက အကာအကွယ်ပေးနိုင်ရေးအတွက် အမျိုးသမီးအလုပ်သမားများ အနေဖြင့် လက်ခံသည့်နိုင်ငံဘက်မှ ကမ်းလှမ်းလာသော အလုပ်ခေါ်စာကို နားလည်သိရှိရန် လိုအပ်သည့်အပြင် အလုပ်ရှင်၊ အလုပ်သမား နှစ်ဦး သဘောတူညီမှုဖြင့် ချုပ်ဆိုသော စာချုပ်ကို အသေးစိတ် ဖတ်ရှုရန် လိုအပ်ပြီး စာချုပ်ပါ အချက်အလက်များအား နားလည်သဘောပေါက် လက်ခံနိုင်မှသာ လက်မှတ်ရေးထိုး စာချုပ်ချုပ်ဆိုရန်လိုကြောင်း၊ စာချုပ်ချုပ်ဆိုပြီး ပါသော အမျိုးသမီးအလုပ်သမား အနေဖြင့် စာချုပ်မိတ္တူ တစ်စောင်ကို ရယူ၍ မိမိနှင့်မကွာ ထားရှိရန် လိုအပ်ပြီး အဆိုပါ စာချုပ်အား မိမိမှ ချိုးဖောက်ခြင်း မပြုရန် လိုအပ်သည့်အပြင် အလုပ်ရှင်ဘက်မှ ချိုးဖောက်ပါက မြန်မာနိုင်ငံ အလုပ်သမားဝန်ကြီးဌာန၊ သက်ဆိုင်ရာနိုင်ငံ မြန်မာသံရုံးနှင့် Labour Attaches အလုပ်သမား အရာရှိတို့ထံ တိုင်ကြားနိုင်ပြီး စာချုပ်ချိုးဖောက်ခံရသူအား အပြည့်အဝ ကာကွယ်ပေးသွားမည်ဖြစ်ကြောင်း ၄င်းက ရှင်းပြသည်။ “အရင်က အမျိုးသမီးတွေကို ပြည်ပမှာ အလုပ်လုပ်ခွင့် မပြုဘူး။ ဟိုတုန်းက ကြားပေါက်အနေနဲ့ နာ့ပ်စ်တွေ လွှတ်တာတော့ရှိတယ်။ ဒါကလည်း တော်တော်နည်းတယ်။ ဘာကြောင့် မလွှတ်တာလဲဆိုတော့ သူတို့သွားလုပ်တဲ့ တိုင်းပြည်မှာ မလိုလားအပ်တဲ့ ပြဿနာတွေ ဖြစ်မှာစိုးလို့ပါ။ အခု အလုပ်လုပ်ခွင့်ပြုတဲ့ နိုင်ငံတွေထဲမှာတော့ ဆော်ဒီကိုတော့ သွားခွင့်မပြုဘူး။ ဒါက အမျိုးသားရော၊ အမျိုးသမီးရောပဲ။ ဘာကြောင့်လဲဆိုတော့ မြန်မာအလုပ်သမားတွေအနေနဲ့ အကြမ်းဖျင်းအားဖြင့် အဲဒီနိုင်ငံရဲ့ ရာသီဥတု၊ ယဉ်ကျေးမှုတွေ၊ ဥပဒေတွေနဲ့ ဘယ်လိုမှ မကိုက်ညီဘူး။ နိုင်ငံတော်ပိုင်း အနေနဲ့ကတော့ ဆော်ဒီနဲ့ ပြဿနာမရှိပါဘူး။ အေးဂျင့်တွေနဲ့ သူတို့ဘာသာ ပြဿနာဖြစ်နေတာ” ဟု ဦးမြင့်နိုင်က ထပ်မံပြောကြားခဲ့ကြောင်း ၂၀၁၁ ခုနှစ် ဒီဇင်ဘာလ ၂၂ ရက်နေ့ထုတ် Popular News ဂျာနယ်တွင် ဖော်ပြထားပါသည်။

No comments:

Post a Comment